Franco Debono lil min se jivvota?

F'intervista li xarabank.com.mt għamel ma' Franco Debono, Dr Debono sostna li huwa għadu tesserat mal-Partit Nazzjonalista. Jgħid: “Qatt ma ġejt infurmat li ma għadnix tesserat. Fil-fatt sentejn ilu bagħtuli mill-PN biex inħallas it-tessera. Dan ifisser li għadni tesserat.”

Jekk, skont Franco Debono,  għadu tesserat, allura jista' jivvota biex jagħżel il-Kap il-ġdid tal-Partit Nazzjonalista. Lil min kieku jivvota?

Franco Debono jwieġeb hekk: “Żgur ma nivvutax lil xi ħadd li qatt ma lagħab futbol u b'opportuniżmu sfaċċat jippretendi li jsir captain."

Kieku Franco Debono għadu fi ħdan il-Partit Nazzjonalista, kien hemm probabiltà kbira li jkun parti mit-tmexxija tal-Partit. Staqsejna lil Franco Debono jekk illum jiddispjaċihx għal dak li kien għamel u jekk kienx jagħmel l-istess illum. Weġibna: “Dak li għamilt kien measure of last resort u nixtieq ma ġejtx f'pożizzjoni li kont kostrett nieħu ċerti stands. Kont qed nimbotta riformi importanti. Jiddispjaċini li weġġajt nies li kienu u għadhom ħbieb tiegħi u nies li appoġġjawni. Kieku llum, le, ma nerġax nagħmel dak li għamilt fi żmien Gonzi. Minkejja li dak iż-żmien kelli ħafna paċenzja llum nifhem li kelli bżonn ħafna iżjed paċenzja u kieku llum nibqa' nippersisti nipprova nbiddel minn ġol-Partit.” 

  

Wara l-aħħar elezzjoni Franco Debono jgħid li kienu ħafna dawk li ħajruh jikkontesta l-elezzjoni għall-Kap tal-PN. Tant kien hemm rispons qawwi, li Franco Debono kkummissjona stħarriġ xjentifiku li sar minn Sagalytics.

F’dan l-istħarriġ, li xarabank.com.mt għandu kopja tiegħu, jirriżultaw ħafna punti interessanti. Insibu li 53% ta’ dawk li fl-aħħar elezzjoni jew ta’ qabilha vvutaw PN jaħsbu li Franco Debono kellu raġun fil-kritika li kien  jagħmel. Skont dan l-istħarriġ, 73% ta’ dawk li vvutaw PN fl-aħħar elezzjoni jew f’ta' qabilha, jgħidu li Franco Debono kellu jingħata aktar spazju biex jaħdem.

Ironikament, 54% ta’ dawk li ħadu sehem fl-istħarriġ ma kinux jafu jsemmu issues li Debono kien qajjem fil-Parlament waqt li l-bqija semmew li Debono tkellem fuq il-qasam tal-ġustizzja u tal-kostituzzjoni, fost oħrajn.

Fost dawk li vvutaw PN fl-aħħar elezzjoni jew ta' qabilha, 43% jaħsbu li llum, Franco Debono jista' jkollu kariga fit-tmexxija tal-Partit Nazzjonalista.

Tlabna l-kummenti ta’ Franco Debono dwar dan l-istħarriġ:

“Dawn ir-riżultati juru li minkejja sentiment ta' ostilità mill-Partit għal diversi snin, xorta ngawdi minn sentiment ta' appoġġ sostanzjali fil-PN u l-Partit irid jagħmel eżami profond tal-kuxjenza biex jifhem kemm żbalja meta ma ħallinix naħdem u ċaħħad lilu nnifsu minn element li seta' kien utli ħafna. Wasal iż-żmien li l-PN jibda jaffaċċja domandi li ilu jitfa' taħt it-tapit. Li l-issues kienu validi u li kelli raġun kienu diġà ċari mir-riżulati elettorali kif ukoll mill-fatt li r-riformi li pproponejt ġew implimentati.”

Staqsejna lil Franco Debono min jaħseb li se jkun il-Kap il-ġdid tal-Partit Nazzjonalista: “Nemmen li mill-kontestanti hemm min għandu l-esperjenza neċessarja biex jieħu f'idejh ir-riedni tal-partit f'dan l-mument tant diffiċli u delikat. Nemmen li se jsir kap mhux min ipaċpaċ l-aktar, imma min għandu track record biex isostni dak il-kliem u wegħdi.”