"Brian kien għadu kif ġie mit-Tuneżija u meta wasal qalli:
'Ma, taf kemm jien iddispjaċut li ma lħaqtx xtrajt souvenirs ta' oħti
għall-Preċett!" Tant iddispjaċih li reġa' tela' weekend ma' ommu
t-Tuneżija biex jixtru s-souvenirs.
Fit-Tuneżija, Brian beda jħossu mhux f'sikktu. Beda jitlef
il-bilanċ u jogħtor, u ommu tgħidilna li darba waħda, f'lejl minnhom, binha
beda jitwal. Minn 5'7 għal 6'7 f'salt.
Spjegawlha li dan kien wieħed mis-sintomi tal-marda li ħakmitu.
Brian jagħmel xahar l-isptar, u ommu Josephine tirringrazzja 'l Alla li ma
kellhiex tarah ibati ħafna.
"Kieku baqa' ħaj u rajtu għadu f'dik it-tbatija kont naqbad
imħadda u nifgah," tgħidilna Josephine, imbikkma wara t-traġedja li
għaddiet minnha.
Illum għaddew 21 sena minn meta Brian ħalliena, "u jien
kuljum għadni nistaqsih għalfejn ħalliena hekk, ħabta u sabta," tkompli
Josephine.
L-aħħar ritratt li ħa Brian kien proprju ma' oħtu Jolene, liebsa
l-libsa tal-Preċett. U anke meta miet, Josephine baqgħet tittama. Baqgħet
tistennieh ġej lura d-dar, baqgħet tistennieh iqum mill-mewt. "Ma tibqax
tirraġuna. Kiefra, kiefra wisq," qaltilna.
Issa Josephine qed tirrakkonta kif dan l-aħħar rat lil binha qisu
ġie lura. "Kellimni u qalli biex inserrħu rasna li qiegħed f'post aħjar,"
tirrakkonta Josephine. "Imbagħad poġġa fuq is-sodda u qalli:
'Mill-plattina li tani niekol il-Mulej, jien aċċettajtha.'"
No comments:
Post a Comment