Waqt il-funeral iqum mill-mewt

Matteo ta' 8 snin, qam mill-mewt waqt il-funeral tiegħu.

It-Tlieta li għadda, f'kappella viċin Palermo, kien qed jiġi ċċelebrat il-funeral ta' Matteo. Tifel li tilef ħajtu wara li marad serjament. Skont Sky24ore, kien għall-ħabta tal-għaxra ta' filgħodu, waqt li kien qed jipprietka s-saċerdot, meta beda jinstema' ħoss ta' xi ħadd jibki. Mal-ħin dan il-biki beda jiżdied. Ommu resqet viċin it-tebut, fetħet l-għatu u sabet li binha kien għadu ħaj. Dak il-ħin Lucia bkiet bil-ferħ għaliex it-talb li talbet bħala devota ta' Santa Rosalia kien instema'.

Ma' Sky24ore, il-Professur Montecassini stqarr: "Iċ-ċkejken kien klinikament mejjet. Ma nafx x'se naqbad ngħid. Forsi bħalissa qed inħarsu lejn dak li jista' jissejjaħ miraklu." 

Aħna tkellimna fuq dan il-fenomenu mal-Kirugu Mr Alex Manchè li jispjegalna dwar il-lazarus syndrome. "Il-lazarus syndrome tirreferi għal bniedem li jqum mill-mewt, xi ħin wara li jiġi ddikjarat mejjet. Din tiġri l-aktar wara li jkun sar is-CPR (Cardiopulmonary resuscitation) fuq il-persuna."

Ritratt: Mr Alex Manchè (Times of Malta)

Jgħidilna li l-iktar spjegazzjoni plawsibbli hija li l-bniedem ma jkunx miet iżda s-sinjali vitali li jindikaw li l-ġisem ta' persuna għadu jiffunzjona tant jkunu neqsin mill-intensità, li l-persuna tkun qed tidher li hija mejta. "Persuna li tkun intilfet minn sensiha, ma tibqax tieħu nifs u magna tal-qalb li ma tibqax turi li l-qalb qiegħda tħabbat, huma xenarji li jagħmlu persuna klinikament mejta."

Mr Manchè jispjegalna kif iseħħ dan il-fenomenu: "Spjegazzjoni waħda hija li l-qalb tista' tibda tħabbat meta timtela b'mod passiv bid-demm wara li jkun sar is-CPR. Jista' jkun wkoll li l-iżbilanċi ta' elettroliti fid-demm jittranġaw u dan jippermetti biex jerġa' jkun hemm attività elettrika fil-qalb biex din terġa' tibda taħdem.

Imma kemm hija komuni? Mr Machè jistqarr li hija rari: "Il-fenomenu huwa rari ħafna. Fil-fatt mill-1982, ġew irrapportati inqas minn 50 każ minn madwar id-dinja."

Dan il-fenomenu qatt seħħ hawn Malta? Mr Machè jweġibna: "Ma nafx każ bħal dan irreġistrat f'Malta."