Jitkeċċa mill-iskola għax l-LSA u l-għalliema ma jridux jagħtuh servizz

Tifel ta' 5 snin li jbati mill-awtiżmu tkeċċa mill-iskola għaliex l-LSA u l-għalliema tiegħu ma jridux jagħtuh is-servizz tagħhom.

Omm ta' żewġt itfal li jbatu bl-awtiżimu tispjega kif binha spiċċa "abbużat" mill-iskola. "It-tifel ingħata l-istess LSA li kellu f'kinder 2 u mill-ewwel ġimgħa bdejna bil-problemi. Beda jiġini d-dar bil-qalziet, biż-żarbun u bil-kalzetti mxarrbin. Minflok ma kienet iċċempilli biex inġiblu xi ħwejjeġ ħalli ma jagħmilx ġurnata bi ħwejjeġ għasra, kienet tħallih jiġri fil-bitħa peress li ma  kienx qed joqogħdilha fil-klassi. Fl-ewwel jum tal-iskola, it-tifel minflok ġbartu mingħandha, spiċċajt ġbartu mingħand ħaddieħor għaliex riedet tirkeb il-vann biex tmur lura d-dar. Sippost t-tifel irrid niġbru mil-LSA u mhux mingħand xi ħaddieħor," tispjegalna l-omm.

L-omm tallega li l-LSA naqset ukoll milli tagħmel xogħolha. "Sippost l-LSA mill-bidu tas-sena kellha tikteb kif inhu sejjer it-tifel. Għaddiet ġimgħa u l-communication book baqa' vojt. Għedtilha diversi drabi dwaru għaliex jiena minn dan il-ktieb biss nista' nkun naf kif inhu sejjer minħabba lit-tifel tiegħi ma jitkellimx. Kien biss bi pressjoni mingħand ta' fuqha li bdiet taħdem fuqu. In-nuqqas f'xogħolha rawh ukoll tal-Inspire meta sabu li ma kellhiex il-flashcards li jintużaw biex it-tifel ikun jista' jikkomunika. Kellhom jgħaddu ġimagħtejn biex dawn saru," tgħidilna l-omm.

Però l-ikbar inkwiet tal-omm żdied meta rat li binha mhuwiex jiekol. "Indunajt li t-tifel ma kienx qed jiekol u wara nsir naf li li l-lunch kienu qed jaħbuhulu biex it-tifel ma jikolx meta jrid hu. Minħabba f'hekk it-tifel beda jbiddel l-attitudni tiegħu." Ir-rabja li beda jkollu t-tifel wasslitu biex iwaddab siġġu lil-LSA. "Minn tifel fil-klassi tiegħu, insir naf li t-tifel waddab siġġu lil-LSA u hija spiċċat qarsitu u ħarab mill-klassi. L-għada mort niċċekkja x'ġara u l-LSA qaltli li veru kien waddabilha siġġu, imma bdiet tgħidli li mhux veru li qarsitu. Mhux talli l-għalliema u l-LSA marru jgħajtu mat-tifel li kixef kollox, talli l-Kap tal-Iskola qaltli biex ma nemmnux għax qed jigdeb. Ma naħsibx li tifel ta' 5 snin jista' jivvinta gidba bħal din," issostni l-omm.

It-tifel jispiċċa mkeċċi mill-iskola. "Il-Ħamis qaluli li se jipprovaw ibidlulu l-klassi għax it-tifel kien qed jiddejjaq ukoll minħabba l-għajjat tal-għalliema, Il-Ġimgħa bagħtu għalina u l-Kap tal-Iskola qaltli li ma jistax jibqa' jattendi l-iskola, wara li r-rapport mill-MUT tal-għalliema qal li l-LSA u l-għalliema qed jirrifjutaw li jagħtu servizz lit-tifel minħabba l-aggressività tat-tifel. Qaluli li l-għażla li għandi hi li nibagħtu programm tal-Inspire, tliet darbiet fil-ġimgħa għax huma ma jistgħu jagħmluli xejn. Issa qed ibiddlu l-verżjoni," tistqarr l-omm.

L-omm kienet talbet l-għajnuna biex tinbidel LSA. "Kont tlabt l-għajnuna tal-Kap tal-Iskola biex lit-tifel ibidlulu l-LSA, iktar u iktar meta rajt li l-imġiba tat-tifel ukoll bdiet tinbidel. It-terapisti wkoll raw li f'dawn l-aħħar ħmistax ma kienx qed jaħdem tajjeb minħabba li kien qed jibki bla waqfien. Jiena ma nistax nagħlaq għajnejja għax l-ewwel sena hija importanti għat-tfal. Meta ġew jiċċekkjaw tal-LSAs, raw lit-tifel ma daħalx fil-klassi tiegħu, imma kien f'oħra u spiċċa mal-art, iħabbat wiċċu. Meta lil-LSA qalulha biex tikkalmah u biex tiġbru minn mal-art, qaltilhom li qed tibża' ma jmurx jiġri xi ħaġa lilha. Ir-risposta li ħadt mingħandhom kienet biex nagħtuha ċans ieħor u kif ma jistgħux ibiddlu l-LSA," tispjegalna l-omm.

"Qatt ma stennejt dan it-tip ta' abbuż fuq tifel ta' 5 snin minn nies li sippost tawh is-sapport. Lil ibni rrovinawh u rrid it-tweġibiet kollha għall-affarijiet kollha li għamlu lil ibni," ittemm tgħidilna l-omm.

Xarabank bagħat il-mistoqsijiet tiegħu lill-Malta Union of Teachers u lill-Ministeru tal-Edukazzjoni.