''Kuntenta ħafna li nistgħu nkomplu x-xewqa li kellu Karl meta kien magħna" - Rose, il-mara ta' Karl

Rose, il-mara ta' Karl Vella, tistqarr li tinsab ċerta li huwa jinsab kuntent li qed titwettaq il-ħolma tiegħu bil-Fondazzjoni.


Karl Vella, il-bniedem li minkejja li kien marid, kien jaħseb u jinkwieta fuq ħaddieħor. Karl, il-bniedem li minkejja l-uġigħ, kien jiġi għall-ġbir li kien isir f'Xarabank u fl-Istrina, għaliex kif kien jistqarr hu stess, dan kien jagħtih s-saħħa.

Wara l-mewt ta' Karl, twaqqfet il-Fondazzjoni Karl Vella li toffri appoġġ edukattiv u psikoloġiku lil tfal li jkollhom qraba tagħhom b'mard serju. Għaldaqstant, aktar kmieni din il-ġimgħa, il-Fondazzjoni fetħet żewġt ikmamar ġodda biex ikunu jistgħu jgħinu aktar tfal. 

Dan għamluh permezz ta' fondi li nġabru u bihom irenxxielhom jibdlu żewġt stalel, f'żewġ kmamar attrezzati biex isir tagħlim li jagħti terapija lil dawn it-tfal. Barra minn hekk, l-ispazju l-ġdid qed jintuża wkoll bħala rekreazzzjoni għall-adoloxxenti.

Aħna tkellimna ma' Rose, il-mara ta' Karl, li tgħidilna li tinsab kuntenta l-Fondazzjoni qed tikber u u li qed tgħin lit-tfal.

"Kuntenta għax ċerta li Karl jinsab kuntent żgur għaliex hu hekk kien iħobb jagħmel meta kien magħna U aħna komplejna fuq il-passi tiegħu u qed inwetqu l-ħolma tiegħu billi nghinu lil tfal għaddejjin minn żmien ħażin"

Bħalissa hemm 18-il tifel u tifla li qed jgħinu u permezz ta' dan l-iżvilupp  jistgħu jgħinu aktar tfal. Rose appellat biex min hu interessat ikun voluntier mal-Fondazzjoni Karl Vella jidħol fuq il-website fejn hemmhekk hemm id-dettalji kollha.

Insellmu l-memorja ta' Karl Vella permezz ta' din il-poeżija li nkitbet minn Sandro Vella:

KARL...

Jekk tiżżewweġ bintek Christine,

xtaqt ittellagħha fuq l-artal.

L-imħabba li kellek ma’ Rose sa l-aħħar ħin,

se tkun lambranzetta eterna mat-tfal.

Kont muġugħ u kullimkien rajnik.

Mort tiġbor għall-“Istrina” waqt it-tbatija.

Għall-“Hospice” u għall-“Puttinu” ukoll sibnik.

Sabuk ukoll il-poplu tat-Tanżanija.

Kellek il-passjoni tal-fotografija.

Qabel m’għalaqt għajnejk ħadtilna ritratt.

Ħallejtna ċċassati, wieqfa, b’qalbna mimlija,

B’imħabba u b’kuraġġ li ma jmutu qatt.