Tkellimna mal-kantanti kollha tal-Eurovision

Ilbieraħ tħabbru dawn is-16-il kanzunetta għall-fażi finali tal-Malta Eurovision Song Contest:

1	Dai Laga	Aidan
2	We Can Run	Avenue Sky
3	Heart Of Gold	Brooke Borg
4	Taboo	Christabelle Borg
5	One Step At A Time	Danica Muscat
6	Turn It Up	Deborah C
7	Back to Life	Eleanor Cassar
8	Supernovas	Jasmine Abela
9	Love Renegade	Lawrence Gray
10	Call 2morrow	Matthew Anthony
11	Breaking Point	Mikhail Attard and Cherylis Camilleri
12	Rocket	Miriana Conte
13	Evolution	Petra
14	Beyond Blue Horizons	Rhiannon Micallef
15	Song For Dad	Richard & Joe Micallef
16	First Time	Tiziana Calleja

U araw ftit x'kellhom x'jgħidulna issa li għaddew:

Aidan: "Kuntent ħafna għax l-ewwel darba li qed nieħu sehem fil-Eurovision. Apparti minn hekk għandi kanzunetta oħra li għaddiet għall-finali, We Can Run, ta' Avenue Sky għax jiena parti minn dan il-grupp. Kuntent li għaddiet ukoll il-kanzunetta li se nkun qed inkanta waħdi għaliex il-kliem u l-mużika ktibthom jiena wkoll. Ikolli nistqarr magħkom li bkejt waħda u sew xħin għajtuli."

Avenue Sky: "Aħna eċċitati ħafna għax bħala grupp ma tantx ilna flimkien u din hija l-ewwel esperjenza tagħna f'festival daqshekk kbir imma ħerqanin ħafna. Naħseb il-grupp tagħna huwa wieħed mill-aqwa boy bands li qatt kien hemm fil-Eurovision."



Brooke Borg: "Minkejja li din mhijiex l-ewwel darba li għaddejt għall-finali, kull sena jkolli l-istess emozzjonijiet. X'ħin tħabbar li l-kanzunetta għaddiet għall-finali, kont kuntenta imma fl-istess ħin waqajt ftit ħażin għal sħabi l-oħra li kienu hemmhekk u ma qalux isimhom. Tal-familja kienu kuntenti ħafna għax emmnu fid-diska imma dan ma jfissirx li ħaduha forgranted li se ngħaddi."



Christabelle Borg: "Ferħana ħafna. Però hija triq twil għax il-Eurovision huwa fi Frar li ġej. Nibdew naħdmu minn issa għax il-kompetizzjoni hija qawwija u hemm ħafna kantanti tajbin li ġieli segwejthom. Ovvjament il-kanzunetti tal-kantanti l-oħra għadni ma smajthomx, però nemmen fil-kanzunetta tiegħi. Jiena nsuq iż-żiemel tiegħi u ħaddieħor isuq iż-żiemel tiegħu."



Danica Muscat:  "Wara li ħdimt ħafna u emmint ħafna fil-kanzunetta, hija ta' sodisfazzjoni li qiegħda mal-finalisti. Kull meta ngħaddi għall-Eurovision inkun kuntenta għax naf li għalkemm ħa jkollok ħafna preparamenti, fl-aħħar mill-aħħar ħa jkollok is-sodisfazzjoni li tajt show tajjeb. Issa naħdmu u naraw minn hemm."



Deborah C: "Ferħana ħafna għax din hija esperjenza pożittiva u dejjem inkun ħerqana għall-Eurovision. L-uniku dispjaċir li għandi hu li Josef mhux qiegħed miegħi, wara sena naħdmu flimkien. Però l-kanzunetta li għandi nemmen ħafna fiha. Naħseb li hija l-iktar kanzunetta għal qalbi u li fiha potenzjal." 

Eleanor Cassar: "Wara ħames snin ma niħux sehem, issa ninsab kuntenta ħafna. Ħdimt ħafna fuq din il-kanzunetta. Hija kanzunetta totalment differenti u anke l-istil tiegħi huwa differenti. Ħerqana ħafna li nerġa' nitla' fuq dak l-istage għax ilni ħafna issa! Immissjajtu."



Jasmine Abela: "Kont eċċitata ħafna imma xħin għajtuli, striħajt u fl-istess ħin tibda tgħid xi ġmiel ħa jkolli opportunità li nerġa' nippjana dan proċess twil u sabiħ. Minkejja li din t-tieni darba tiegħi, xorta kelli dik l-emozzjoni minkejja li pprovajt nibqa' kalma."



Lawrence Gray: "Kuntent ħafna li ħa nerġa' nkun hemmhekk wara sena ma nieħu sehem. L-importanti għalija li nipparteċipa, li qiegħed hemmhekk, li nieħu gost u li nagħti gost il-fans tal-Eurovision."



Matthew Anthony: "L-ewwel darba li qed nieħu sehem fil-Eurovision u hija naqra surrealistika l-ħaġa għalija għax jiena vera fan kbir tal-Eurovision u nħobb insegwi l-kantanti ta' Malta u anke ta' barra, u issa li jiena parti minnhom, għaddew jumejn u xorta ma nistax nemmen tant kemm jien kuntent ħafna!"



Mikhail Attard u Cherylis Camilleri: "Ninsabu verament kuntenti għax din hija l-ewwel esperjenza tagħna. Din id-diska minn dejjem konna nemmnu fiha u din hija t-tielet darba li ssottomettejnieha u fl-aħħar għaddiet. Issa ħerqanin li naqsmu din l-esperjenza flimkien. Nawguraw kull suċċess lill-kantanti l-oħrajna u jalla l-wirja tagħna tkun waħda tajba u li tintlaqa' min-nies."

Mirana Conte: "Onestament dakinhar li mort għall-audition, qabadni laryngitis il-lejl ta' qabel, u l-audition mort bla leħen. Allura ma tantx kont ċerta jekk se ngħaddix jew le. Għalhekk ilbieraħ ħadt sorpriza tal-blieh. Kuntenta ħafna li għat-tieni darba reġa' rnexxieli."



Petra: "Inħossni kuntenta ħafna għax ilni erba' snin ma nieħu sehem. Issa nibdew il-preparament għal Frar li ġej."



Rhiannon Micallef: "Kuntenta ħafna li rnexxieil ngħaddi għat-tieni darba konsekuttiva fi ħdan il-festival! L-impenn ilu li beda u issa għandi l-opportunità li nwettaq dak li xtaqt u ħerqana ħafna għal li jmiss. Beyond Blue Horizons' hi kanzunetta li emmint ħafna fiha, b'ħoss differenti għal Eurovision. Nispera u nittama li l-għan u l-messaġġ jintlaħaq u nkomplu bix-xogħol li jien flimkien mat-tim tiegħi bdejna."



Richard & Joe Micallef (Joe): "Ħadt pjaċir li 'l Richard daħlitlu l-kanzunetta għax bħala kantawtur huwa dedikat ħafna. Din is-sena jew il-bidu tas-sena d-dieħla ħa jkollu tarbija u jekk jirbaħ, ikun rigal sabiħ għalih. Min-naħa tiegħi diġà rbaħt għax għandi l-unur ngħid li naħseb li jiena l-ixjeħ li qatt kien hemm s'issa f'dan il-festival. Għandna kliem oriġinali u kanzunetta tajba għax kieku ma kinitx tasal sa din il-fażi. Kien semmagħhieli fuq il-kitarra u kien qalli: "Din għalik u għalija u jekk ma tagħmilhiex miegħi, ma ndaħħalhiex" u għedtlu "Mhux se niksirlek qalbek." Nirringrazzja lil Alla u nispera li nibqa' ħaj biex nagħmilha."

Tiziana Calleja: "Jiena kont ilni ma nidħol mill-2010. Jiġifieri domt ma naħsibha ftit imma din is-sena għandi tim li mbuttaw naqra miegħi wkoll u irnexxielna nagħmlu s'hawn. Ma stennejthiex imma kont fil-logħba u ħdimt għaliha biex nasal sal-finali mbagħad jiġri li jrid. Issa naħdmu għal li jmiss."

Il-Eurovision se jsir fi Frar li ġej.

Ritratt tal-faċċata: Television