Tippubblika ktieb u kalendarju dwar Malta bil-Ġappuniż

Din Miyuki Sugihara. Ġappuniża li ddeċidiet li tgħix Malta u issa spiċċat tbigħ ktieb u kalendarju l-Ġappun, bi tpinġijiet ta' Malta li pinġet hi stess.

Erba' snin ilu Miyku tiddeċiedi li tiġi Malta. "Ibni kien ibati minn allerġija u kienet l-aħjar deċiżjoni li mmorru noqogħdu f'pajjiż b'temp sabiħ u jkun imdawwar bil-baħar. Mort l-Awstralja, l-Ingilterra u wara xahar Franza, iddeċidejt nagħmel tlett ijiem Malta għal vaganza minħabba t-temp. F'dawk il-jiem kulma rajt il-Belt u Buġibba, u minn dawk iż-żewġ postijiet ukoll inġbidt lejn Malta," tispjegalna Miyuki.

F'dawk il-jiem tpinġi żewġ tpinġijiet tal-Belt. "Meta mort lura l-Ġappun kull darba bdejt nistaqsi lili nnifsi; "Għala m'iniex hemm? Jiena hemm għandi nkun? U ddeċidejt li ngħix f'Malta għal dejjem." Minn hemm, Miyuki tibda tpinġi kull fejn tmur.

"F'Malta bdejt inpinġi kullimkien. Fil-Ġappun din ma stajtx nagħmilha għax kullimkien imdawwar bin-nies, b'sinjali u b'binjiet għoljin. Hawn nista' npinġi l-kuntrast li nara bejn il-baħar ċar u l-bini."

Miyuki tikteb 4 kotba dwar kif wieħed għandu jpinġi u javviċinawha biex tagħmel ktieb bit-tpinġijiet tagħha ta' Malta. "Avviċinatni l-kumpanija tal-pubblikazzjoni biex nagħmel ktieb bit-tpinġijiet tal-postijiet Maltin. Imma kont ilni hawn Malta sena biss, u ma kontx lesta. Kont qed inpinġi għal pjaċir u qatt ma kelli l-ħsieb li npinġi biex nippubblika ktieb.

Sentejn u nofs wara taċċetta u tiddeċiedi li tippubblika ktieb. "Sħabi dawruni f'postijiet li qatt ma kont naf bihom u ddeċidejt li nippubblika l-ktieb. Bdejt inpinġi ħafna postijiet li ma nsibuhomx fi ktieb tal-ivvjaġġar biex il-Ġappuniżi jsiru jafu bihom." Fil-fatt f'dan il-ktieb issib postijiet li mhumiex magħrufa daqshekk mat-turisti imma mbagħad issib affarijiet ta' tradizzjoni, ta' kultura, apparti li xi paġni juruk kif tpinġi ċerti xenarji.

Fl-2017 tippubblika kalendarju bi stampi ta' diversi pajjiżi Ewropej, u nofsu mimli bi tpinġijiet ta' Malta. Għas-sena 2018, Miyuki tiddeċiedi li tagħmel kalendarju bi tpinġijiet kollha ta' Malta. "Minħabba li fl-2018, Malta se tkun il-Belt Ewropea tal-Kultura, ħassejt li għandi niċċelebraha bħala artista li qed ngħix f'dan il-pajjiż. Xtaqt li bil-kalendarju, il-Ġappuniżi jsiru jafu dwar Malta, iktar u iktar meta din is-sena Malta ssemmiet ħafna fuq it-televiżjoni."

Tagħlaq b'messaġġ dwar Malta. "Malta minkejja li mhijiex perfetta, nista' nħoss li n-nies hawnhekk qed jgħixu l-ħajja tagħhom b'mod individwali. Din ma tarahiex fil-Ġappun, fejn in-nies jilbsu u jimxu fl-istess direzzjoni. Hawnhekkk f'kull individwu u f'kull xena, tara storja.