Missier Jerome għadu kemm għamel tattoo ta' ibnu fuq sidru

Kenneth Frendo, li jiġi missier Jerome, għadu kif għamel tattoo ta' wiċċ ibnu fuq sidru din il-ġimgħa. Jerome huwa ż-żagħżugħ li nħakem mill-marda qerrieda tal-kanċer tliet darbiet wara xulxin u li ħalliena fis-6 ta' Ottubru li għadda.

Aħna tkellimna ma' Kenneth, missier Jerome u ma' Thomaz, li huwa t-tattoo artist li għamilhielu.



"Billi għamilt it-tattoo mhux se nġib lit-tifel lura," qalilna Kenneth. "Imma waħda mill-aħħar affarijiet li qalli qabel miet kienet biex nibqgħu niftakruh bit-tbissima li nafuh biha. U għamilt din it-tattoo bħala parti mill-commitment biex inżomm lil Jerome dejjem miegħi, fuqi, bħalma dejjem kien fuqi meta kien marid."

Kenneth mhuwiex bniedem tat-tattoos. Fil-fatt qatt ma kien għamel tattoo f'ħajtu. Din l-ewwel waħda u qalilna li mhux beħsiebu jagħmel oħra, u meta għamilha weġġa' ħafna.

"Jien mhux tattoo għamilt propja, imma portrait," qalilna Kenneth. "U rrid li meta mmut nindifen bl-istampa tat-tifel fuq sidri. Ridt li jkun miegħi b'mod permanenti."

Kenneth mar għand Thomaz nhar t-Tnejn li għadda, wara li laqqgħethom flimkien ħabiba komuni tagħhom. Thomaz kien sema' b'Jerome u l-familja tiegħu, imma qatt ma kien iltaqa' magħhom.

"Impressjonajt ruħi meta Kenneth ġie biex jagħmel it-tattoo għandi," qalilna Thomaz. Qattajna ġurnata flimkien u l-enerġija pożittiva li għandu bellhitni. Wara li telaq iddispjaċieni li qatt ma kelli ċ-ċans li niltaqa' ma' Jerome innifsu."

Thomaz qalilna li s-soltu, meta jkollu każijiet bħal dawn, jidħol ippreparat biex jisma' ħafna emozzjonijiet negattivi li l-klijenti tiegħu jispiċċaw jisfugaw miegħu. Imma bil-pożittività tiegħu, Kenneth kien qisu klijent normali u miegħu seta' jitkellem fuq l-affarijiet kollha sbieħ tal-ħajja.

"Fl-ebda ħin ma ġagħlni nitħassru," qalilna Thomaz. "U malli mort id-dar, l-unika ħaġa li rnexxieli ngħid lill-mara kienet: 'Madonna kemm hu b'saħħtu dak ir-raġel!'"

B'kollox, it-tpinġija ħadet 10 sigħat sakemm lestewha, u Kenneth qalilna li fadallu jpinġi quote ta' Jerome maġenbha, imma tant weġġa', li ma kellux saħħa jlestiha f'darba.