best deal

Saturday, 19 May 2018

Tasal fi tmiemha l-avventura ta' Buffon ma' Juventus



"6111-il ġurnata, 6111-il emozzjoni ta' passjoni, ta' ferħ u biki, ta' rebħ u telf. Grazzi lilkom li kontu parti minn din l-avvenutra għax kull wieħed u waħda minnkom għamiltu din l-avventura indimentikabbli."




Din biċċa mill-messaġġ li kiteb Buffon fuq Instagram hekk kif ftit tal-ħin ieħor tiġi fi tmiemha avventura li damet 17-il sena.

Il-gowler ta' fama mondjali Gianluigi Buffon se jħalli lit-tim ta' Juventus wara numru ta' snin. Fihom huwa kiseb il-qlub mhux biss tal-partitarji Juventini iżda wkoll ta' dawk kollha li jsegwu dan l-isport.


Bla dubju kull min għandu għal qalbu t-tim Juventin ħadd ma xtaq li din il-ġurnata tasal. Dejjem tkun qed taħseb li dan il-jum xi darba se jasal iżda qatt ma tkun tridu li jseħħ meta jkollok gowler bħal Buffon, wieħed mill-aqwa gowlers li ra l-futbol Taljan u mondjali, jiddefendi l-lasti tat-tim tiegħek.



Kif stqarr hu stess fil-konferenza tal-aħbarijiet li ta nhar il-Ħamis li għadda ġewwa Alianz Stadium f'Turin, Buffon qal li l-futur tiegħu għadu inċert jekk ikomplix jilgħab ma' xi tim ieħor jew iddendilx iż-żarbun u jerfa' l-ingwanti u jieħu kariga barra mill-grawnd mat-tim ta' Juventus. Dan wara li fl-aħħar jiem irċieva numri ta' proposti li ġagħluh jerġa' jikkunsidra d-deċiżjoni tiegħu. Kulħadd jaf li Buffon tista' tgħid rebaħ kull unur kemm personali u anke mal-klabb li tista' timmaġina barra waħda, il-UEFA Champions League. Jista' jkun li jerġa' jikkunsidra li jibqa' jilgħab jekk dejjem jingħaqad ma' xi tim kompettiv għal din it-tazza proprju għalhekk bit-tama li jieħu t-tazza li baqagħlu nieqsa mill-unuri. 

Kompla jgħid li għalih dawn kienu 17-il sena li ħallew timbru f'ħajtu li fihom rebaħ 9 kampjonati, 4 darbiet il-Coppa Italia mat-tim ta' Juventus u 5 Super Coppa Italia mat-tim ta' Juventus.

Hu spiċċa billi rringrazzja lid-direġenti, l-istaff u coaches kollha li kien hemm matul dawn is-snin iżda fuq kollox irringrazzja l-isupporters li dejjem kienu hemm għalih u għat-tim Juventin, u wegħidhom li se jibqgħu dejjem f'qalbu u li Juventus se jibqa' dejjem id-dar tiegħu għal dejjem.

Fil-partita tal-lum kontra Verona, apparti li fi tmiem tal-partita jiġu inkurunati champions għas-7 sena konsekuttiva, bla dubju mhux se jonqsu li l-partitarji jsellmu lill-idolu tagħhom għall-aħħar darba b'dan il-flokk fejn hu mifhum li se jagħmlu xi koreografija apposta biex jirringrazzjawh ta' dak kollu i għamel għat-tim Juventin u kif vera jistħoqqlu.

Kitba: Matthew Vassallo

No comments:

Post a comment